നിശബ്ദമായ ചിന്തകള്‍

അകന്നു പോകുന്ന പാതകള്‍

ബാക്കിവച്ചു പോകുന്ന

ചില ചലനങ്ങളുണ്ട്..

എപ്പൊഴും

തിരകളെപ്പോലെയത്

മടങ്ങിവരാറില്ല

തിരിച്ചെടുക്കാനാവാത്ത നല്‍കലുകളെ

ഉപേക്ഷിക്കലാവും അത്..

ചില കിളിപ്പാട്ടുകളില്ലേ,

എവിടെയാണോ,അവിടെ മാത്രം കേള്‍പ്പിച്ച്

ഒടുവില്‍,അദ്യശ്യമാക്കപ്പെട്ട്

ഉറവിടം മാത്രം പറിച്ചുനടപ്പെടുന്നത്

കാല്‍ക്കലഴുകുന്ന ഇലകള്‍പോലെയാവില്ല,

അകന്നുകൊണ്ടിരിക്കുന്ന

ചിറകടികള്‍ പോലെ,എപ്പൊഴും

സ്വയമേ ഉപേക്ഷിച്ചുകൊണ്ടിരിക്കും

എന്റെ നോട്ടങ്ങള്‍ തടുക്കപ്പെടുന്ന

ഓരോ വളവുകള്‍ക്കുമപ്പുറമാണ്

നിലാവില്‍ ഞാന്‍ മാത്രം കണ്ടിരുന്ന

ചില ഇടങ്ങള്‍..

മുള്‍ക്കാടുകള്‍ മറഞ്ഞ,

കാട്ടുറുമ്പുകള്‍ നിറഞ്ഞ,

പോറലുകളുണ്ട് എന്റെ പിറകില്‍

നക്ഷത്രങ്ങളേപ്പോലെ

ചില രാത്രികളില്‍ മാത്രം

പ്രത്യക്ഷപ്പെടുന്നവ...

ഒരു ഇലത്തുമ്പിയേയോ,

ഒരു ഓലേഞ്ഞാലിയേയോ

പോലായിരുന്നെങ്കില്‍..

വേണ്ടായിരുന്നു,ഇത്രയും നീളം

ഈ കണ്ണുകള്‍ക്ക്...